Impyisi n'Imana

Impyisi yari hamwe n'izindi nyamaswa, maze irebye umulizo wayo isanga utameze nk'uw'izindi. Ako kanya ifata umugambi wo kuzajya kubaza Imana icyatumye iyiha umulizo mubi kandi udasa n'uw'izindi nyamaswa.

Iryo joro ntiyasinzira; bucya yageze ku Mana. Irayibwira, iti « Nyagasani, ntiwambwira impamvu yatumye umpa umulizo utameze nk'iyindi ? Ese wabitewe n'iki ? » Imana irayisubiza iti « nyamara, ndasanga naraguhaye umulizo ugukwiriye. Ariko rero ubwo utawishimiye, ukaba ushaka urutaho, ndabanza nguhe icyo ukora maze nugaruka wagishoboye nguhindurire umulizo nguhe uwo wifuza. »
Impyisi iremera. Maze Imana ishaka igisembe cy'intama, iragifata ikizirika ku gahanga k'jyo mpyisi. Iti « ngaho genda, ntukore kuri iki gisembe uze kukinzanira nimugoroba. »

Impyisi iragenda. Impumuro y'icyo gisembe iyitera ipfa. Irenze umusozi wa mbere amerwe aba arayishe. Ariko irihangana irakomeza. Igeze ku musozi wa kabiri, iba itangiye kukirigata. Ku musozi wa gatatu, amerwe aba arayirembeje itagishoboye kwihangana; iti:"hoshi! Izina ry' ubupyisi rirakampama! Urubwa ruruta ububwa. " Ako kanya cya gisembe ikimira bunguri.

Nimugoroba igaruka ku Mana isoni zayishe, yabuze uko yifata. Imana iyibonye iti:" cya gisembe kiri he ? " Impyisi irasubiza iti:" amerwe n'inzara byanyishe, ngiye gupfa ndakilya ! " Imana iti:" nuko rero ! Ubwo wakiriye, ntushobore kwihangana ngo ukigarure, wowe n'izindi mpyisi zose muzahorana iteka umulizo nk'uwo. " Impyisi itaha ityo, ntiyongera kubaza Imana iby'umulizo wayo; igumana uwo yari isanganywe.

" Iraguha ntimugura."

ABA BANA BARANYOBEYE

ABA BANA BARANYOBEYE
BANGAMBIKI


Mugabe wagabanye n'Imana
Uri umugabo utagoheka
Uhetse u Rwanda rwose
Uri umubyeyi w'abanyarwanda
Nkuragije imbaga yarwo yose

Aba bana uko babanye
Ntibyanyuzeho na gatoya

Aba bana baranyobeye
Baratongana bigacika
Birirwa bacumitana amacumu
Nk'abatonse rimwe
Bapfa agasate k'umutsima.
Jya ubatsibura ntukabatsembe

Aba bana baranyobeye
Umwe aranyonyomba agatikura undi
Agataha avuga amacumu
Nk'utsinze Nsibura
Kandi yikoze mu nda

Aba bana baranyobeye
Birirwa bavumana
Bavugutirana amarozi
Bakubitanisha inkuba
Bavugana inkuru mbi
Bategana imishibuka
Barebana ay'ingwe
Batungana agatoki
Bahekenyerana amenyo
Batukana ibya Nkotsi na Bikara
Bahekenyeshanya umusaraba

Aba bana baranyobeye
Nirirwa mbahana barananiye
Ni uguhana uwahanutse
Ni uguhomera iyonkeje
Ni ugukamira mu kiva
Ni uguta inyuma ya Huye
Ni ukugosorera mu rucaca

Ntibagira ubuntu
Barangwa n'ubwiko
Ufashe imbehe aba ikihebe
Ngo atihenda bakamuhebya
Iyi si inda ni indogano
Uwabaroze ntiyakarabye.

BANGAMBIKI